वेगवान मराठी प्रतिनिधी केशव डि मुंडे दिनांक 22 मे 2026 परळी वैजनाथ: परळी वैजनाथ शहरात पैशांच्या किरकोळ वादातून एका हॉटेल चालकाची चाकूने गळा चिरून निर्घृण हत्या करण्यात आल्याची धक्कादायक घटना समोर आली आहे. कारभारी नारायण आंधळे असे मृत व्यक्तीचे नाव आहे,
या प्रकरणी परळी शहर पोलीस ठाण्यात दोन संशयित आरोपींविरुद्ध खुनाचा गुन्हा दाखल करण्यात आला असून एकास ताब्यात घेण्यात आले आहे.
दारूच्या नशेत झालेल्या वादाचे रूपांतर थेट हत्येत झाल्याने परळी परिसरात प्रचंड खळबळ उडाली आहे.
मृत कारभारी आंधळे हे परळीत पवन हॉटेल चालवून आपल्या कुटुंबाचा उदरनिर्वाह करत होते. २१ मे रोजी रात्री हॉटेल बंद झाल्यानंतर कारभारी आंधळे हे संशयित आरोपी सचिन सोमनाथ राठोड आणि सुमीत पवार यांच्यासोबत दारू पित बसले होते.
दारू पित असतानाच त्यांच्यात पैशांच्या देवाण घेवाणी वरून अचानक वादास तोंड फुटले.
या वादाचे रूपांतर पुढे हाणामारीत झाले. संशयित आरोपी सचिन राठोड याने कारभारी आंधळे यांना घट्ट पकडून ठेवले, आणि सुमीत पवार याने आपल्या जवळील धारदार चाकूने कारभारी यांच्या मानेवर आणि हातावर सपासप वार केले.
या प्राणघातक हल्ल्यात गंभीर जखमी झालेले कारभारी आंधळे रक्ताच्या थारोळ्यात जमिनीवर कोसळले.
घटना घडल्यानंतर संशयित आरोपी सचिन राठोड याने कारभारी आंधळे यांच्या लहान मुलाला फोन करून तुमचे वडील जखमी अवस्थेत पडले असल्याची माहिती दिली.
घटनेची माहिती मिळताच मृताचा मोठा मुलगा ओमकेश आंधळे आणि नातेवाईक तातडीने परळी येथील अरुणोदय मार्केट लाईन परिसरातील मोकळ्या जागेत धावले. तेथे कारभारी आंधळे हे निपचित पडलेले आढळून आले.
दरम्यान नातेवाईकांनी तातडीने पोलिसांशी संपर्क साधून त्यांना अंबाजोगाई येथील शासकीय रुग्णालयात दाखल केले. मात्र, डॉक्टरांनी त्यांना मृत घोषित केले.
या प्रकरणी ओमकेश आंधळे याच्या फिर्यादीवरून परळी पोलिसांनी सचिन राठोड आणि सुमीत पवार यांच्याविरुद्ध गुन्हा दाखल केला आहे.
पोलिसांनी सचिन राठोड यास ताब्यात घेतले असून सुमित पवार फरार झाला आहे. पोलीस उपनिरिक्षक नितीन गट्टूवार पुढील तपास करत आहेत.
wegwan marathi parli beed maharashtra
केशव मुंडे हे अनेक वर्षापासून पत्रकारिता करत आहे. सामाजिक, शैक्षणिक राजकीय, गुन्हेगारी सह विविध विषयांवर लिखान सध्या ते वेगवान समुहाच्या वेगवान मराठी मध्ये बीड जिल्ह्यातील प्रतिनिधी म्हणून काम पाहत आहे.
